ممكن نتكلم بصراحه ....

ممكن نتكلم بصراحه .... ممكن طيب
كلنا بنسمع وبنشوف ما يدور والمشادات اللي بتحصل ، وان الرئيس هو المسئول الأول عن الحادثة والهجوم ، والحوار يحتدم وممكن يقلب لخناق
لما بشوف الكلام ده بتذكر عباره ركزوا فيها معايا

من كان يريد امرأة كفاطمة فليكن رجلا كعلي

فهمتوني ؟
كله عمال يدور ايه الحقوق اللي ليه وناسي الواجبات اللي عليه
كله بيركز على أخطاء غيره وسايب أخطاؤه
كله عايز اللي حواليه يتغيروا ويشتغلوا وهو مهته بس النقد والتعليق وهو قاعد مكانه مش بيتحرك ولا ناوي يتحرك
يقول الله تعالى : ((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))

لو كان الرئيس أي اسم ممكن يخطر على بالك سواء بتأيديه أو بتعارضيه كان هيحصل اللي حصل لأن المشكلة مش فيه لوحده المشكلة في اللي حواليه كمان

فاكرين عمر بن الخطاب لما قال : والله لو أن ناقة عثرت فى العراق لسألني الله عنها ؟

نفسكم ولي أمرنا أيا كان يكون زي عمر ؟
وأنا معاكم بس قبل ما تطالبوه بكده انتم تكونوا زي اللي كان بيحمكهم عمر

كونوا زي الصحابة في تعاملاتهم وفي أخلاقهم وفي تمسكهم في دينهم وحرصهم على تطبيق شريعة الله

كونوا زيهم في إيثارهم و حبهم لبعض وانهم على قلب رجل واحد
مش بيشمتوا في بعض ولا كل همهم انهم يثبتوا غلط اللي قدامهم اكبر من همهم انهم يثبتوا صحة كلامهم
يقول صلى الله عليه وسلم : " مثل المؤمنين في توادهم وتراحمهم وتعاطفهم مثل الجسد الواحد إذا اشتكي منه عضو تداعي له سائر الجسد بالسهر والحمى".

كونوا زيهم في تقواهم و حرصهم على إن كل قرش يدخلوه بيتهم يكون من الحلال
جاءت فتاه الى الامام احمد بن حنبل تقول له انى اغزل فنغزل بالليل فلما يغيب ضوء القمر لا نجد ما نغزل عليه فاحيانا يمر العسكر فنغزل فى ضوء شعاع العسكر ايجوز لنا هذا؟؟؟
فنظر اليها وامتلات عيناه بالدموع وسالها من انتى؟؟ قالت له انا اخت الشافعى فقال لها ان من بيتكم تخرج التقوى فليغزل كل الناس الا اهل بيتك فمن بيتكم تخرج التقوى.

كام واحد او واحدة من اللي طالبوا مرسي انه يكون مثل عمر بتزوغ من الشغل
وكام واحد أو واحدة بتقبل الإكراميات أو حتى بتديها بس علشان تمشي حالها وتاخد اللي مش ليها
كام واحدة بتأخر شغلها او تعطل مصالح الناس وتوقف حالهم وتقول عندي مشاكل أو بشتغل على قد الفلوس اللي باخدها
كام واحد أو واحدة بتاخد هدية من اللي تحت ايدها من الموظفين أو من الطلبة لو كانت مدرسة وبتنسى إن هدايا العمال غلول
كام واحد أو واحدة مقضيه كل مكالماتها من تليفون الشغل وتصوير ورق خاص ليها من ورق وآلة تصوير الشغل
كام واحد أو واحدة بتؤذي جيرانها بلسانها أو بفعلها ولو مجرد إنها ترمي القمامة في الشارع أو تسيب غسيلها ينقط على غسيل جيرانها
كام واحده مش عايزة تلبس الحجاب
كام واحدة بتقول قطع يد السارق تخلف
كام واحدة باختصار رافضة تطبيق شرع الله ؟
كام واحد بيسيب مكان شغله ويروح يشرب قهوة ولا شاي ويقول هو ايه اللي هيحصل يعني ؟

عمر لما بكى على مسئوليته عن الناقة اللي عثرت
كان بيقطع يد السارق وكان بيرجم الزاني
وكان بيطبق شرع الله كله
مبياخدش اللي عايزه يثبت وجهة نظره ويسيب الباقي

الدين مش بيتجزأ
الدين مش مطلوب من الوالي فقط في الجزء اللي يريحني وجاي على مزاجي أقوله مبتعملش كده ليه واسيب الباقي
الدين مش مطلوب من الوالي والرعية تعمل ما بدا لها بعد كده
وكل مصيبة يبقى الوالي هو السبب فيها ولو كان كويس الدنيا هتبقى كويسة
يقول الله تعالى : " أفتؤمنون ببعض الكتاب وتكفرون ببعض "

مينفعش
الدين كله لازم نطبقه على بعض مينفعش انقي وآخد اللي يريحني وأسيب اللي مش عاجبني

من الآخر استحالة يجي والي كويس الا لما نبقى احنا كويسين ونستاهله
((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))

لما غيرنا ما في أنفسنا فترة وللأسف كانت فترة صغيرة جدا قدرنا نشيل دولة الظلم
ووقفنا عند كده افتكرنا إن كده عملنا اللي علينا
وده مش حقيقي مفيش حاجة اتغيرت في تعاملاتنا وفي أخلاقنا وعلاقتنا بالله
بالعكس في كتير سلوكياته بقت أسوء وبقى عذرا للكلمة بلطجي بقى كل شيء بالذراع وصوتنا علي وبقى كل واحد ياخد اليل عايزه بالقوة حتى لو مش من حقه

لازم نغير اللي في انفسنا الأول
لازم نقوم بواجباتنا الأول قبل ما نطالب بحقوقنا
لازم نبص على عيوبنا الأول وبعدين نبص على عيوب غيرنا
لازم نبني أو على الأقل نساعد على البناء مش نهدم

لو واحد بيبنيي أو عايز يبني وقدامه مليون بيهدموا مش هيعمل حاجة
و لو مليون بيبنوا وواحد عايز يهدم مش هيقدر يمنعهم

قبل ما نطالب مرسي بالتغيير لازم نتغير
قبل ما نطالبه بالبناء لازم نبني
قبل ما نطالبه بحقوقنا لازم نقوم بواجباتنا
قبل ما ادور على مصالحي ادور على مصالح الناس كلهم

وغير كده هنرجع لورا وعمرنا ما هنتقدم خطوة
جه وقت العمل كفاية كلام وبس وياريته كلام صح
جه وقت تقديم مصلحة الوطن والناس على المصالح الشخصية
جه وقت الرجوع للدين علشان الأمة تتقدم بجد وتعز بجد
وهأختم كلامي بكلام عمر بن الخطاب

نحن قوم اعزنا الله بالاسلام فاذا ابتغينا العزة بغيره اذلنا الله

ولاحظوا قال قوم وقال ابتغينا
يعني الكلام للجميع مش للوالي أو الرئيس فقط
العز مش بفلان ولا علان اللي لو مسك الدنيا هتبقى زي الفل
العز مش بإننا نقلد الدولة الفلانية أو القوانين الفلانية
العز بس بالتمسك بالدين ورجوعنا إليه كلنا

اللهم ارفع مقتك وغضبك عنا وردنا إلى دينك ردا جميلا

الشعب المصرى شعب يبذل الكثير من الجهد عندما يجد الرعاية والتوجيه الصحيح والاهتمام
بدليل انه ينجح فى الخارج ويصبح عالم مشهور ..لماذا؟
لان كل المحيطين به وهو معهم يعملون بجدية ولتحقيق هدف معين ينهض بهم وبالدولة
عندما يكون كل رئيس عمل اى عمل بدءاً من رئيس الوزراء الى رئيس عمال النظافة يراعى الله فى عمله وادارته ليس بالتوجيه فقط ولكن بالاشراف على العمل ,يترك مكتبه ويشرف بنفسه على سير العمل حتى يكون قدوة للمرؤس وعندما يأخذ كل عامل حقه نتيجة عمله لن يبخل العامل بجهده
لماذا يفضل المصرى العمل فى الدول الاخرى ؟
لانه عندما يتبع قوانين العمل ويلتزم بها يعود بالفائدة عليه

ياريت نحب بعضنا ونحب بلدنا اكتر ونحب ما نعمل ونتقى الله فى كل شىء حتى لو لم يرانا رئيس العمل فالله يرانا

اللهم اهدينا لما فيه الخير والفلاح
===============================

=========

» انا بقا هخرج لوحدى ... ماهو اللى ممكن يحصلى بره ممكن يحصلى جوه
» كل منا له رأي خاص بالحب أدخل هنا وقول رأيك بصراحه..........
» ممكن طلب منك ؟
» هل ممكن أنك تحب شخص عمرك ما شفته في حياتك
» اجمل 10 صور عارية ممكن تشوفها