كحك العيد بالملبن ( راحة الحلقوم ) بأسهل طريقة من مطبخي ان شاء الله

كحك العيد بالملبن ( راحة الحلقوم ) بأسهل طريقة من مطبخي ان شاء الله
اللهم صل وسلم وبارك على سيدنا محمد
السلام عليكم ورحمة الله وبركاتة
ازيكوا اخواتي الغاليات
كل سنة وانتوا طيبين وباااالف خيييير ان شاء الله
ورمضان كريم عليكم
ويااارب تحققوا كل امنياتكم ويتقبل صالح اعمالكم
ويبلغنا ليلة القدر ان شاء الله

النهاردة حبيباتي موضوعنا عن كحك العيييييد
ويارب تقضوا احلى عيييد وكل ايامكم افراح ورضا من الله
واحلى حاجة في الكحك انه بيبقى ليه فرحة وهو بيتعمل
وبيعبر عن العيد وجمااله بفضل الله

بسم الله نبدأ المقادير :
7 كوب دقيق ونصف يعني كيلو دقيق موزون على الميزان ومعاه نصف كوب دقيق -كوبين ونصف سمن
4 ملاعق كبيرة قشطة
4 ملاعق كبيرة زبادي يعني علبة زبادي العلبة 80 جرام
او4 معالق حليب سايل لو مش حابة زبادى نحط بداله حليب
معلقتين كباااار سمسم - 3 ملاعق كبيرة جوز هند ناعم
معلقة كبيرة خميرة بيرة او فورية مذوبة مع معلقة كبيرة سكر ومعلقتين كبار مية
ربع معلقة صغيرة ملح
1/2 معلقة صغيرة ريحة كحك او قرفة
او نقطتين ريحة موز سايلة من عند العطار

بسم الله الطريقة :
اول شيء نسمي الله وندوب الخميرة اول حاجة
نضع الخميرة مع السكر وندوبها مع المية وندخلها الفرن مطفي عشان تتفاعل
في حلة كبيرة نحط الدقيق وعليه الملح وفي النص نعمل حفرة ونحط فيها السمسم
نعاير السمنة في الحلة كوبين ونص سمنة
ونحط السمنة على نااار متوسطة عشان نقدحها كويس
وطبعا قدح السمنة هو السر في الكحك الجمييييل لو السمنة مقدوحة كويس
الكحك هيفضل محافظ على شكله في الفرن
ولو مش مقدوحة كويس الكحك هينزل كل السمنة اللي فيه في الصينية
وتبقى حواليه بتعوم ههههههه بعيد الشر طبعا ان شاء الله
المهم نرجع للسمنة على النار هتسيح في البداية
ولو حطينا فيها كام واحدة سمسم هيفضل ابيض زي ماهو مش هيتحمر
وهينزل تحت في قاع الحلة
لان السمنة لسة ماقدحتش
وبعد 10 دقايق والسمنة بتقدح على النار وتغلي
لما نحط فيها كام حبة سمسم هيتلون في نفس الثاانية ويتحمر

وعلامة تانية نعرف بيها ان السمنة قدحت اننا لما نحط سمسم يرتفع بسرعة اووي على وش السمنة
و يتحمر وبيطرقع سبحان الله علامة ان السمنة قدحت واي سمسم نحطه فيها
بيتحمر بنفس الثانية ومش بياخد دقيقة حتى
ودي علامة قدح السمنة بفضل الله

دلوقتي نمسك حلة السمنة برفق ونسمي الله ونصب مقدار السمنة على حلة الدقيق
واحنا بعيييد عن البخار الحااااار اوووي يارب يعافيكم حبيباتي
ونسيب السمنة كده في الوسط لمدة دقيقة عشان تسّوي السمسم اللي في النص

ونبدأ نقلب بالمعلقة الستنالس عشان تتوزع السمنة في كل الدقيق
وهيا لسة بتغلي سبحانك يارب من شدة حرارتها

ونقلب كل الدقيق اللي مستخبي تحت وعلى الجوانب عشان كله يتشرب بالسمنة المقدوحة

ونبس الدقيق بالسمنة المقدوحة بظهر المعلقة نضغط الدقيق بالسمنة
واحنا بنقلب عشان يتشرب الدقيق كل السمنة ان شاء الله

وده شكل العجينة بعد مااا اتبست وتشربت كل السمنة بفضل الله ولونها بقى بيج هادي
دلوقتي لاااااازم نسيب عجينة الكحك تبرد تمااااما
قبل اضافة الخميرة لانها بتبقى سخنة اووووي
ولو ضيفنا عليها الخميرة والعجينة سخنة الخميرة مش هتتفاعل وهتموت
بعيييد الشر ان شاء الله
ونسيب العجينة تبرد تحت المروحة لمدة نص ساعة مثلا
وبعدها نضيف الخميرة المذوبة في المية والسكر ان شاء الله

وبعد مابردت العجينة كويس اووي تحت المروحة
نصب الخميرة عالعجينة اللي ماشاء الله تبارك الله تضاعف حجمها

ونحط الزبادي وجوز الهند وريحة الكحك ونعجن العجينة بايدينا عشان تختلط كل المكونات ولو مش حابين نحط زبادي نستبدله بحليب سايل وهيبقى رااائع برده
بس الزبادي ميزته انه بيدي الكحك ريحة جميييلة اوووي وبيضيع دسامة السمنة

وآخر حاجة القشطة بجمالها وبياضها الراائع ونعجن عشان تتشربها العجينة
وهيا سر الطعم الرهييب في الكحك اللي بتمنع ان الكحك يكون
كأننا بناكل سمنة القشطة بقى بتديله طعم جميييل اوووي وبتضيع دسامة الكحك ان شاء الله

نشتغل في تشكيل الكحك على طوووول بدون ماننتظر انه يخمر
ونروح عالترابيزة ونفرش المفرش ونجيب العدة والمناقيش ونسمي الله
ونبدأ رحلة تشكيل الكحك ببهجته وجمااااله وروايح العيييد الجمييييلة
وبنطلع قطعة عجينة قدامنا وجنبها ملبن وباقي العجينة بنخليه في الحلة متغطي
وكل ماتخلص العجينة نجيب حتة كمااان لحد ماتخلص العجينة ان شاء الله

قيموني حسب ذوووقكم يااحلى اخوااات
لو عجبكم الموضوع وشجعونى أكمل لكم البسكوت والغريبه،،
وكل سنه وأنتم طيبيييييين

الله الله على الروايح واضح من ريحته انه هيلاقى استحسان
هههههههههههههههههه
تسلم ايدك يا أدمن

» بسم الله الرحمن الرحيم اسأل لكم الله فى هذا الصباح راحة تمﻷ نفسك ورضى يغمر قلبك وعمﻻ يرضى ربك وسعادة تعلو وجهك ونصرا يقهر عدوك وذكرا يشغل وقتك وعفوا يغسل ذنبك وفرحت يمحو همك ورزقا يقضى دينك ودعاء يصلح عملك
» اخر ايام العيد ينعاد علينا بخير ان شاء الله
» حسن الظن .. راحة للقلب
» عن أنس بن مالك رضي الله عنه قال: سمعت رسول الله صلى الله عليه وسلم يقول
» تكبيرات العيد